Miigo ang magnitude 6.7 nga linog sa habagatang Peru Huwebes, lokal nga oras, sumala sa United States Geological Survey (USGS).
Ang sentro sa linog natala 38 kilometro amihanan-kasadpan sa Upahuacho, sa probinsya sa Parinacochas, rehiyon sa Ayacucho, ug adunay giladmon nga mga 66 kilometro.
Nabati ang kusog nga pagtay-og sa daghang bahin sa habagatang Peru, lakip ang Ica ug Arequipa.
Samtang, nagtaho ang Geophysical Institute of Peru (IGP) og mas taas nga magnitude nga 7.2, nga adunay giladmon nga 108 kilometro.
Sa inisyal nga report, walay natala nga halapad nga kadaot. Nagpadayon ang mga awtoridad sa pag-assess sa mga lugar nga naapektuhan sa linog.
Nagtaho usab ang Peruvian Navy nga walay hulga sa tsunami.
Ang Peru nahimutang sa Pacific Ring of Fire, busa kanunay kini makasinati og kusog nga mga linog.
