Nangandam ang gobyerno alang sa posibleng pagsaka sa presyo sa lana sa merkado sa kalibutan tungod sa nagkagrabe nga tensyon ug panagbangi sa Middle East.
Sumala ni Presidente Ferdinand “Bongbong” Marcos Jr., nga ang gobyerno nagtuon na sa mga lakang aron maminusan ang epekto sa mga Pilipino.
Dugang sa presidente nga ang Pilipinas ug ang tibuok kalibutan karon nakasinati sa mga epekto sa kagubot sa Middle East, labi na ang pagsaka sa presyo sa lana.
Naapektuhan ang pag-agi sa mga barko nga puno sa lana sa Strait of Hormuz, nga usa sa labing importante nga il routes sa kalibutan.
Tungod niini, ang presyo sa petrolyo lagmit nga motaas sa sunod semana nga gibanabana nga ang presyo sa gasolina motaas og P7.48 matag litro, diesel og P17.28, ug kerosene og P32.35.
Agig tubag, ang Malacañang nakig-alayon na karon sa Kongreso aron hatagan ang Presidente og gahum nga temporaryong pakunhuran ang excise tax sa petrolyo kung ang presyo sa lana sa merkado sa kalibutan moabot sa US$80 matag bariles.
Adunay usab mga plano nga usbon ang Biofuels Act of 2006 aron tugotan ang paggamit sa mas barato nga bioethanol.
Gipasalig usab sa Presidente nga ang gobyerno mopagawas sa mga subsidya sa gasolina ug mga cash transfer para sa apektadong sektor.
