Nianunsyo ang Philippine Health Insurance Corporation (PhilHealth) og benefit package nga ma avail sa mga miyembro nga makasinati og heat-related nga mga sakit gumikan sa init nga panahon.
Matod sa tigpamaba sa PhilHealth nga si Dr. Israel Francis Pargas, ang mga sakit nga sakop sa nasangpit nga benefit package mao ang heat exhaustion, heat syncope o pagkaluya/pagkalipong tungod sa sobrang kainit ug heat stroke.
Ang coverage sa benefit package gikan sa P12,000 ngadto sa P18,000.
Gipasabot ni Dr. Pargas nga adunay lain-laing coverage depende sa serbisyo, pananglitan kon ma-admit sa usa ka ward sa pampubliko o pribadong tambalanan, pobre man o dili, kinahanglan nga walay copayment o bayad ang miyembro alang sa usa ka bahin sa medical expenses.
Matud usab ni Dr. Pargas nga bisan og dili na kinahanglan nga magpa-ospital, makadawat gihapon ka og mga benepisyo, ug sa higayon nga rehistrado ka nga miyembro, wala nay dugang nga requirements.
Ang bag-ong gitudlo nga PhilHealth President ug CEO Edwin Mercado niawhag sa mga miyembro nga magpabiling alerto sa posibleng mga sakit, magpabiling hydrated, ug likayan ang dugay nga pagkabulad sa adlaw.
