Gibasura sa Office of the Ombudsman ang reklamo sa plunder, graft ug malversation batok kang Executive Secretary Ralph Recto ug kanhi Philippine Health Insurance Corp. (PhilHealth) Chief Executive Officer Emmanuel Ledesma.
Ang reklamo nag-alegar sa mando ni Recto, kinsa hepe sa Department of Finance niadtong panahona, nga ibalhin ang wala magamit nga pondo sa Philhealth nga nagkantidad og P60 bilyon ngadto sa nasudnong panudlanan human sa usa ka espesyal nga probisyon sa 2024 budget.
Gilatid sa 40-ka-panid nga resolusyon nga ilang gibasura ang reklamo tungod sa kakulang sa prima facie evidence ug uban pang ebidensya batok sa nahisgutang mga opisyal.
Dugang pa nila nga ilang gibasura ang paglapas sa Anti-Plunder Act tungod kay ang P60-B nga pondo gibalik na sa Philhealth.
Napakyas usab ang mga nagreklamo sa pagpamatuod nga sila si Recto ug Ledesma manubag ubos sa Anti-Graft and Corrupt Practices Act.
Klaro nga walay nakitang kalapasan tungod kay si Recto nag-isyu og mando bahin sa pagbalhin sa pondo ug si Ledesma mituman usab sa mando.
