Gikumpirmar sa Philippine Space Agency (PhilSA) ang paglusad sa Long March 7A rocket sa China.
Ang rocket gilusad gikan sa Wenchang Spacecraft launch site sa Wenchang, Hainan Province niadtong Huwebes sa gabii.
Unang nipagawas og pasidaan ang ahensya kabahin sa posibleng pagkahulog sa mga debris gikan sa maong rocket sa kadagatan nga sakop sa Ilocos Norte ug Cagayan.
Hinungdan nga partikular nga gimonitor sa PhilSA ang kadagatan, 38 nautical miles gikan sa Burgos, Ilocos Norte ug 66 NM gikan sa Sta. Ana, Cagayan.
Matod sa ahensya, bisan og wala gipaabot nga mahulog ang maong rocket sa yuta, ang mga debris ug ubang bahin niini mahimong mahulog sa kadagatan, nga usa ka dakong hulga ug peligro sa mga moagi nga barko, eroplano, fishing banks, ug uban pang mga sakyanan o duol sa drop zone.
Giingong posibleng adunay mga debris nga mahulog ug molutaw sa kadagatan.
Gumikan niini, gitambagan sa ahensya ang publiko nga i-report dayon sa mga otoridad kung adunay makita nga bahin sa rocket o bisan unsang kadudahang butang.
