Gipasalig sa Department of the Interior and Local Government (DILG) nga ang mga bayolenteng aksyong protesta sama sa nahitabo sa Nepal ug Indonesia nga may kalabotan sa mga isyu sa korapsyon, dili mahitabo sa Pilipinas.
Matod ni DILG Secretary Jonvic Remulla, bisan og andam ang gobyerno sa bisan unsang senaryo, dili batasan sa mga Pilipino ang pag-vandalize o pagsunog sa mga building taliwala sa mga protesta.
Apan, nagpatawag gihapon og command conference ang DILG aron sa pag-andam og mga contingency plans sa higayon nga adunay kaylap nga mga protesta batok sa korapsyon, nunot sa nahitabo sa ubang kanasuran.
Dugang pa sa kalihim nga ang kapolisan anaa sa maximum tolerance ug gipahinumdoman ang mga otoridad nga magmalinawon ug tahuron ang katungod sa mga raliyista.
Samtang si PNP acting chief Lt. Gen. Jose Melencio Nartatez Jr. niingon nga andam na ang security plan alang sa crowd control ug dispersal kung gikinahanglan.
