Nanawagan ang Pilipinas alang sa mas lig-on nga panaghiusa sa mga nasod aron sulbaron ang mga hagit sa kalibotan, lakip na ang climate change, armadong panagbangi, kakulang sa seguridad sa pagkaon, ug mga hulga sa seguridad sa kadagatan.
Sa pakigpulong ni Foreign Affairs Secretary Maria Theresa Lazaro atol sa ika-81 nga United Nations General Assembly, gihatagan niini og gibug-aton ang kamahinungdanon sa diplomasya, internasyonal nga balaod, ug kooperasyon sa daghang nasod aron makab-ot ang malungtarong kalinaw.
Nanawagan usab ang Pilipinas alang sa dinaliang paghunong sa panagsangka (ceasefire) sa Gaza, pagpanalipod sa mga sibilyan, ug pagtahod sa katungod sa mga Palestinian sa pagdeterminar sa ilang kaugalingong kaugmaon (self-determination).
Gipasiugda usab ni Lazaro ang epekto sa climate change sa Pilipinas, diin iyang namatikdan nga kapin sa 2.7 ka milyon nga pamilya ang naapektuhan sa mga bagyo ug habagat sukad niadtong Agosto.
Lakip usab sa mga gihisgutan ang panginahanglan alang sa responsable nga pagdumala sa AI (artificial intelligence), pagpanalipod sa mga migranteng trabahante ug mga tripulante sa barko, ug ang pagmintinar sa gawasnon ug luwas nga kadagatan.
Gipadayon usab sa Pilipinas ang baruganan nga ang internasyonal nga balaod kinahanglan magpabilin nga giya sa pagsulbad sa mga panagbangi—lakip na kadtong anaa sa South China Sea—ug nanawagan alang sa mga reporma sa UN Security Council aron mas mapakita niini ang mga interes ug mas matubag ang mga panginahanglan sa mga nag-uswag nga nasod.
Ang High-Level Week sa ika-81 nga UN General Assembly gipahigayon sa United Nations Headquarters sa New York City, United States, gikan sa Septiyembre 22 hangtod 28.
