Mitaliwan na si Pilar Garrido Corrales, ang sikat nga Filipino singer ug entertainer nga naila sa propesyon nga si “Pilita Corrales”, sa edad nga 85 anyos, karung adlawa Abril 12, 2025.
Kini gipaambit sa iyahang apo nga si Janine Gutierrez sa iyahang social Media Post, apan ang hinungdan sa kamatayon ni Corrales wala gibutyag sa publiko.
Natawo kini sa Dakbayan sa Sugbo, niadtong 1939, si Corrales kay giila nga usa ka trailblazer sa musika sa Pilipinas.
Nailhan si Pilita Corrales niadtong Dekada 60’s isip mag-aawit sa musikang Bisaya sama sa ‘Matud Nila’ ug sa iyang kanta nga ‘Usahay’. Sa ulahi iyang gipalapdan ang iyang karera isip usa ka artista sa pelikula ug telebisyon.
Gitawag nga “Asia’s Queen of Songs” ug “The Greatest Singer in the Philippines,” nakarekord siya og kapin sa 135 ka mga album sa usa ka karera nga mikabat og kapin sa unom ka dekada.
Siya ang unang Filipino artist nga nag-una sa Australian pop charts ug nakadaog sa internasyonal nga pag-ila sa Tokyo Music Festival niadtong 1972.
Ang iyang impluwensya milambo sa telebisyon ug pelikula, uban sa iyang variety show nga “An Evening with Pilita” nga giisip nga landmark sa Philippine broadcasting.
Nakadawat og daghang pasidungog si Corrales, lakip ang Lifetime Achievement Award gikan sa Philippine Association of the Record Industry (PARI) ug honorary Doctorate in Music gikan sa University of Visayas.
Gihinumdoman siya sa walay kataposang mga hit sama sa “A Million Thanks to You”, “Kapantay ay Langit,” ug kaylap nga gipasidungog sa pagtabang sa pagdala sa musikang Filipino ngadto sa internasyonal nga mga tigpaminaw.
