PROVINCE OF CEBU-Isip supporta sa pinaka-unang Panagbagat Festival sa lungsod sa Poro sa isla sa Camotes, nakadawat ang kagamhanang lungsod og kapin P4.47-milyones gikan sa mga nakadaiyang opisyal sa maong distrito ug sa probinsya.
Ang maong subsidiya kay gikan sa kagamhanang lalawigan sa Sugbo nga migahin og P3-milyones nga gidawat ni Poro Mayor Gary Rama aron sa pagtapak sa mga gastuhan sa maong pasundayag pinaagi a socio-cultural allocation niini ug laing tag P300,000 sa matag usa sa upat ka mga clustered barangays nga misalmot.
Mihatag sab si Cebu 5th District Representative Duke Frasco og P130,000 matag usa sa top 4 contingents kinsa nakadawat og P50,000 ang first placer, P40,000 sa second placer, P30,000 sa third placer, ug P10,000 sa fourth placer.
Ang lungsod sa Poro sa Camotes Islands nagsaulog sa ilang madasigon nga kultura ug tradisyon pinaagi sa inaugural nga pagpahigayon sa Panagbagat Festival sa ilang Central School grounds niadtong gabii sa adlaw nga Sabado, Oktubre 26.
Ang Panagbagat Festival gihimo isip pasidungog sa patron sa lungsod nga si Santa Maria del Rosario.
Ang Panagbagat, nga nagkahulogang “paghiusa,” naghandom sa makasaysayanong kasabutan sa kalinaw tali sa nagkaaway nga mga tribu ni “Tag Anito” gikan sa kasadpan ug sa tribong “Maktang” gikan sa sidlakan nga gihusay ubos sa maalamong tambag sa konseho sa Panganuron pipila ka millennia na ang milabay.
