Subling nagkagrabe ang relasyon tali ni U.S. President Donald Trump ug Pope Leo XIV human ang presidente mibalos pag-usab sa Santo Papa sa social media, nga nagtawag kaniya nga usa ka “hyper-liberal partisan” ug nagkuwestiyon sa iyang kredibilidad isip usa ka Santo Papa.
Ang panaglalis naggikan sa magkaatbang nga mga panan-aw sa gubat tali sa Estados Unidos ug Israel batok sa Iran, nga temporaryong nahunong pinaagi sa usa ka “fragile ceasefire.”
Sa usa ka serye sa mga online post, gipaambit ni Trump ang iyang giingon nga mga daan nga pahayag nga gihimo sa Santo Papa sa wala pa ang iyang pagkapili, gamit ang ngalang Robert Prevost.
Base sa mga screenshot nga naglibot, ang Santo Papa giingon nga kritikal sa palisiya nga “America First”, ingon man kang Trump ug Bise Presidente sa Estados Unidos nga si JD Vance, labi na sa imigrasyon, pagkontrol sa armas, ug uban pang mga isyu.
Ang social media account gikataho nga gitangtang sa adlaw nga siya napili nga Santo Papa, nga misangpot sa espekulasyon nga iyang gitangtang ang iyang nangaging mga pahayag, apan walay direktang mitubag si Pope Leo sa mga bag-ong pag-atake ni Trump.
Mahinumduman nga ang Santo Papa unang nagkondena sa giingon nga gubat, nga nagtawag niini nga “bangis” ug “dili tawhanon.”
Sa laing bahin, atol sa iyang biyahe gikan sa Algeria ngadto sa Cameroon isip kabahin sa iyang 10 ka adlaw nga pagbisita sa Africa, gipasiugda sa Santo Papa ang kamahinungdanon sa pagtahod ug diyalogo bisan pa sa mga kalainan sa mga gituohan.
Sumala ni Papa Leo, posible nga ang mga tawo mabuhi nga malinawon bisan kung sila adunay lainlaing mga relihiyon, paagi sa pagsimba, ug estilo sa kinabuhi.
Sa laing post, gipasiugda ni Trump nga ang hulga gikan sa Iran dili angay pakamenoson, tungod sa liboan ka mga kamatayon nga nahitabo na ingon man ang peligro sa pagpanag-iya niini og mga armas nukleyar.
Si Pope Leo magsaulog sa usa ka tuig sa Mayo isip lider sa 1.4 bilyon nga mga miyembro sa Simbahang Katoliko. Human sa hilom nga unang mga bulan sa iyang pagpangulo, siya nahimong mas vocal bag-ohay lang, labi na sa iyang pagsaway sa nagpadayon nga gubat sa Middle East.
Sa usa ka interbyu, ang Santo Papa miingon nga ipadayon niya ang iyang pagsaway sa gubat bisan pa sa mga pahayag ni Trump.
Samtang, gipasiugda ni U.S. VP JD Vance nga ang Santo Papa kinahanglan nga mag-amping sa iyang mga pahayag sa mga isyu nga may kalabotan sa gubat.
