Giasoy ni Danilo Arao, ang Convenor sa Kontra Daya, nga sa umaabot nga Lunes, Hulyo 27, mao ang ika-lima nga State of the Nation Address ni President Ferdinand Marcos Jr., ug matod niya, susama sa mga nangaging SONA sa Presidente, adunay ipahigayon usab nga People’s SONA.
Mao kini ang gikabutyag ni Arao atol sa eksklusibong pakighinabi sa Bombo Radyo Cebu kaniya, ug iyang gidugang nga, gawas sa People’s SONA, mag-abutay usab ang mga nagkadaiyang katawhan ug nagkalain-laing grupo sa lain-laing dapit usab sa Commonwealth Avenue.
Apan, giangkon ni Arao nga sa kasamtangan, medyo naalarma na sila sa sitwasyon sa kapolisan, tungod sa giingong pagdili niini sa mga kilos-protesta tungod sa kadaghang gipangdili, bisan pa ang simple nga mga venue, assembly point, program proper sa lugar, kay gikahangol pa ngadto sa nagkalain-laing grupo.
Subay niini, gahapong adlawa usab, gipahibalo ni House Speaker Faustino “Bojie” Dy III nga andam na ang House of Representatives sa pag-host sa ika-5 nga SONA ni PBBM, human gipangulohan niini ang katapusang inspeksyon ug dry run sa plenary hall.
Sumala ni Dy, gipasalig sa House nga ang tanang pagpangandam hapsay, luwas, ug angay sa kamahinungdanon sa okasyon.
Samtang, ang Philippine National Police (PNP) mopadala usab og kapin sa 20,000 ka mga opisyal sa Batasang Pambansa sa Quezon City aron masiguro ang seguridad sa lugar samtang ang mga pagpangandam sa seguridad mosulod sa ilang katapusang hugna.
Gimandoan sab ni PNP chief Gen. Jose Melencio Nartatez Jr. ang tanang yunit sa National Capital Region Police Office (NCRPO) nga susihon ang ilang mga plano sa pag-deploy.
