CEBU CITY-Labing menos 23 sa 129 ka mga atleta nga giobserbahan ang na-admit sa ospital, ug 11 ang padayon pa nga gitambalan, sumala ni Dr. Peter Mancao, head doctor sa Cebu City Medical Center (CCMC), karong Biyernes, Hulyo 12.
Matud pa ni Mancao nga kasagaran sa gi-admit nga mga delegado sa Palarong Pambansa mga atleta nga na-diagnose nga adunay dengue ug kasagarang nakasinati og mild symptoms.
Dugang pa, nga adunay mga atleta nga posibleng nataptan og dengue sa wala pa moabot sa Sugbo, sanglit usa ka atleta ang gihilantan sa wala pa mosulod sa billeting quarters.
Gawas sa mga kaso sa dengue, ang Palaro medical team usab ang nag-atiman sa uban pang sports-related injuries sama sa mga bali sa tuhod, sprains, ug dislokasyon.
Nagtambal usab kini sa mga sakit sama sa pneumonia, tonsilitis, ug labad sa ulo sa mga atleta.
Gitambagan ni Dr. Mancao ang mga atleta nga unahon ang ilang kaluwasan ug kalimpyo.
Iyang gipasalig nga andam ang publiko ug pribadong tambalanan sa dakbayan sa Sugbo nga mohatag og medical assistance sa mga atleta.
