Gikalipay sa pipila ka mga drayber sa Ceres liner subay na sa posibling pagpasaka sa pletehan, apan sukwahi niini ang mga pasahero kay ang posibling pagpasaka sa pletehan, naghatag lang og dakong kabalaka nila.
Subay niini, eksklusibong pakighinabi sa Bombo Radyo Cebu Newsteam si Godo Fredo Quinco, usa ka Ceres liner driver, diin iyang gikabutyag nga lisud ang ilang pagpamasahero karon kay adunay mga higayon nga mobiya sila sa terminal nga walay nabitbit nga pasahero, ug lisud usab tungod sa pagsaka sa presyo sa krudo.
Dugang ni Quinco, ang giluwat karon sa Land Transportation Franchising and Regulatory Board (LTFRB) nga updated fare guide alang sa Provincial Public Utility Buses (PUB’s) mas maayo kini ug gikalipay niya isip bus driver tungod kay sa kasamtangan, alkanse sila sa ilang matag byahe ug wala nay subra sa ilahang income.
Sa pikas bahin, sukwahi niini ang pipila ka mga pasahero sama ni Angel Fernandez, diin iya usab nga gikabutyag atol sa eksklusibong pakighinabi sa Bombo Radyo Cebu Newsteam kaniya nga nagdugang lang kini sa kalisud ug niduyog usab sa padayong pagsaka usab sa presyo sa mga batikang panginahanglanoon karon.
