CEBU CITY-Gipulawan sa pipila ka mga kandidato ug ingon man sa ilahang mga tigpaluyo ang kataposang hugna sa inihapay sa mga boto.
Human niini, dayun nga gihatod ang mga ballot boxes ngadto sa Cebu City Hall kung diin opisyal nga i-proklamar ang mga midaog sa nahitabong piniliay kagahapong adlaawa, Oktubre 30, 2023.
Apan bisan pa man nga wala pay opisyal nga proklamasyon, nahugyaw ang Mabolo Elementary School sa dakbayan sa Sugbo alang sa mga dumadapig ni kandidato Atty. Daniel Francis Arguedo kay nakakuha siyag dakong lead gikan sa pipila ka presinto batok sa laing tulo niya ka kaatbang.
Ang maong eskuylahan nga nagsilbing usa sa mga polling centers sa Dakbayan, napuno na sa mga tigpaluyo aron masaksihan ang pagpahibalo sa katapusang mga resulta alang sa BSKE 2023.
Samtang, usa sa labing unang barangay kinsa mipagawas sa final ug unofficial result sa mga midaog nga mga opisyales sa barangay mao ang Barangay Tawason sa Dakabayan sa Mandaue.
Kung diin, midaog pagka barangay captain si Glenn Seno Bordario samtang midaog ang mga musunod isip barangay konsehal: Inez, Loyola, Bilocura, Herana, Tibon, Heyrana, ug Seno.
Samtang, midaog isip SK chairman si Jess Vincent Arcilla Sungahid ug ingon man naka line-up sila si Arcilla, Dabalos, Mendoza, Opo, Ducante, ug Ibanez isip SK councilors.
Sa pikas nga bahin, nanumpa ang mga bag-ong opisyales sa mga barangay sa Budlaan, Sto. Nino, Ermita, Cogon Ramos, Sta. Cruz, Sudlon 1, Pahina San Nicolas, Tagbao, Buhisan, ug Mabini, kinsa mulingkod sunod termino sa mga posisyon sa barangay ug sangguniang kabataan.
Gipangulohan ni Cebu City Mayor Mike Rama ang naasoy nga seremonya, kung diin daghan pang grupo sa mga midaog nga mga opisyales ang gilaumang manumpa.
