PROVINCE OF CEBU- Nihimo og nagkadaiyang pakulo ang pipila ka mga Police Station sa Probinsya sa Sugbo subay sa selebrasyon sa Adlaw sa mga Kasingkasing o Valentine’s Day karong adlawa, Pebrero 14, 2026.
Sa Lungsod sa Carmen, ang Carmen Police Station, nagpahigayon og Pre-Valentine’s Acoustic Concert, nga nagdala og gugma ug musika sa Carmen Plaza Pebrero 13 pinaagi sa espesyal nga Valentine’s acoustic night.
Kini, ginangunahan ni PMAJ Jude Cebrero, OIC, kung diin, ang mga manag-uyab, magtiayon, barkada, pamilya, ug mga mahiligon sa musika nalingaw sa hayahay nga gabii ilalom sa mga bituon, samtang nag-uban sa pag-awit sa kinasingkasing nga mga kanta.
Sumala sa mga kapulisan sa Carmen, simple ra ang tumong: ipakita sa katawhan nga ang kalinaw ug maayong relasyon sa komunidad makab-ot pinaagi sa pagtahud ug pagtinabangay sa matag-usa.
Samtang sa San Fernando Municipal Police Station (MPS), gipakita usab nga ang serbisyo sa kapulisan dili lang kutob sa pagpanalipod, kundili apil ang pagpakita og kaluoy ug pag-amuma sa komunidad.
Gisurpresa sa mga kapulisan ang mga motorista pinaagi sa paghatag og bulak ug tsokolate, usa ka pahinumdom nga sa likod sa uniporme, adunay kasingkasing nga puno sa pagmahal ug matinud-anong pag-alagad.
Ubos sa liderato ni PMAJ Michael C. Gingoyon, ang San Fernando MPS mipabati sa kainit sa Valentine’s Day pinaagi sa mga bulak ug tam-is nga pahiyom, nga naghatag dugang inspirasyon ug positibong pagbati sa kadalanan.
