Nakadawat na og Metropolitan Cebu Water District (MCWD) water supply ang mga residente sa Sitio National Housing Authority (NHA) ug kasikbit nga mga sitio sa Barangay Busay human sa kapin tulo ka dekada nga walay kasaligan nga suplay sa tubig.
Personal nga gisaksihan ni Cebu City Mayor Nestor Archival ang pag-inspeksyon sa mga MCWD stub-out connections nga karon nag-serbisyo sa kapin 240 ka residente.
Matud sa MCWD, 12 ka stub-out ang nahuman na, ug laing unom pa ang planong itukod sa Enero 2026 nga makabenepisyo sa dugang 120 ka residente, lakip na ang mga pamilya sa relocation site
Subay niini, nipadayag og kalipay ug pasalamat ang mga lumulupyo nga sa pila ka dekada kay nakabaton na kini og tinud-anay nga suplay sa tubig human sa 30 ka tuig nga pag-antos.
Gisugdan ang proyekto pinaagi sa groundbreaking ceremony niadtong Septiyembre nga gitambongan ni Mayor Archival ug MCWD General Manager Edgar Donoso, isip timaan sa paningkamot sa syudad ug MCWD nga mahatagan og basic services ang mga komunidad nga dugay nang nalimtan.
