Anaa sa luwas nga kahimtang ang pito ka mga sakay human sila gi-rescue sa Philippine Coast Guard kagabii sa Brgy. Taytay, Danao City, Cebu.
Mibyahe ang maong motorbanca gikan sa Camotes Island apan nagkaproblema ang makina niini sa dihang padung na kini modunggo sa Danao Port.
Sakay sa maong motorbanca mao ang operator nga si Petronilo Cularte, mga pasahero nga silang Candyce Macatangay, Lily Rose Musil, ug Celedinio Jevelanios Jr.
Luwas usab ang taga-Finland nga silang Johanna Todeer ug Lassi Tolonen; ug Swedish-national nga si Pawel Patterson.
Matud sa tigpamaba sa PCG-7 nga si Lieutenant Junior Grade Michael John Encina nga daling miresponde ang Quick Response Team gikan sa Coast Guard Danao Station human masigpatan ang maong motorbanca.
Gipasalamatan usab sa PCG-7 ang Coast Guard Danao Station tungod sa dinalian nilang pagresponde.
Una nang mipahibalo ang Coast Guard nga kanselado ang tanang byahe sa barko sa Cebu ug Bohol human gipaubos sa Signal Number 1 tungod sa bagyong Ursula.
