Gisalikway ni Land Transportation Franchising and Regulatory Board Chairperson Teofilo Guadiz III ang mga pangangkon nga ang public utility vehicle (PUV) modernization program mopatuman dayon og usbaw sa plitehan.
Matud pa ni Guadiz nga ang kasamtangang plitehan sa mga PUVs kay magpabilin.
Dugang pa niini nga wala’y basehan ang pagpatuman sa pagsaka sa plitehan sa mga public utility vehicles tungod sa pipila ka mga hinungdan sama sa inflation ug presyo sa lana diin kinahanglang ikonsiderar sa dili pa aprobahan sa ahensya ang bag-ong umento sa plitehan.
Sa pagkakaron, ang minimum nga plitehan sa mga tradisyonal nga jeepney anaa sa P13 samtang P15 sa modernong jeepney.
Gipasalig kini ni Guadiz nunot sa pangangkon ni Gregory Perez, pangu sa Pinagkaisang Samahan ng mga Tsuper sa Opereytor Nationwide Cebu, nga kon hingpit nang ipatuman ang PUV modernization program, mosaka ngadto sa P40 ang plitehan sa jeep, kon konsiderahon ang gasto sa modernong mga jeepney, nga gikan sa mga P1.5 ngadto sa P2.7 milyones.
