PROVINCE OF BOHOL- Gipalig-on sa Bohol Police Provincial Office ang ilang kampanya batok sa “illegal drug tourism” nga kasagarang mahitabo sa mga tourist destinations sa probinsiya.
Sa pakighinabi sa Bombo Newsteam ni Police Lt. Col. Norman Nuñez, tigpamaba sa PNP Bohol, ilang giila nga usa kini sa mga isyu nga kinahanglang tutukan, ilabi na sa lugar nga Panglao, diin kasagaran sila makadakop og mga binultong illegal nga droga.
Base sa ilang assessment, tulo ka lugar sa Bohol ang giila nga high-demand areas sa illegal drugs—Tagbilaran City, Dauis, ug Panglao. Mas dako ang demand, mas daghan ang supply, ug mas lisod kini ma-detect, ilabi na sa mga lugar nga puno sa mga turista ug temporaryong mga bisita.
Gipasabot ni Nuñez nga ang daghang tourist arrivals kada adlaw, ang kadagatan nga agianan, ug ang mga tawo nga musulod ug mogawas sa probinsya maoy pipila sa mga hinungdan nganong lisod masubay ang lihok sa illegal drug trade.
Tungod niini, naglunsad og mga countermeasures ang PNP Bohol.
Nakig-alayon sila sa Philippine Ports Authority, Philippine Coast Guard-7, ug PDEA-7 aron mapalig-on ang seguridad sa mga pantalan ug tugpahanan.
Usa sa mga lakang mao ang paggamit sa K9 units aron magpahigayon og random inspections sa mga pasahero ug kargamento nga musulod ug mogawas sa Bohol.
Gipakusgan usab ang pagbantay sa mga coastal areas sa tabang sa Bantay Dagat sa PCG.
Ilabi na nga ang coastal length sa Bohol moabot og 650 kilometros, nga usa ka dakong hagit sa pagbantay.
Gideploy usab ang ilang mga intelligence units ug mga asset aron mamonitor ug makapangolekta og impormasyon gikan sa mga lokalidad.
Gi-awhag usab ang publiko sa pagreport sa bisan unsang kadudahang kalihokan sa ilang mga lugar.
Nagpasalamat ang PNP Bohol sa suporta sa Provincial Government ug mga LGU sa probinsya, ilabi na sa pinansyal nga tabang ug kolaborasyon, aron mapadayon ang kalinaw, kahapsay, ug kampanya batok sa illegal nga droga sa Bohol.
