Giklaro sa Philippine National Police (PNP) nga wala pa sila makadawat og impormasyon bahin sa giingong hulga sa kinabuhi ni Vice President Sara Duterte.
Sumala sa PNP Chief Gen. Jose Melencio Nartatez Jr., padayon nilang gimonitor ang sitwasyon human miingon ang Bise Presidente nga nahadlok siya alang sa iyang kaugalingon ug sa iyang pamilya.
Matud ni Nartatez, wala usab silay rekord nga adunay gireport o girehistro ang kampo ni Duterte sa bisan unsang estasyon sa pulis bahin sa maong hulga.
Dugang pa, giingon niini nga usab silay namonitor nga lehitimong hulga batok sa Bise Presidente o sa iyang pamilya.
Giawhag sa PNP si Duterte nga ireport ang bisan unsang hulga aron kini maimbestigahan ug mapamatud-an, lakip ang mga dokumento o pahayag nga mahimong magsilbing ebidensya.
Gipasalig usab ni Nartatez nga tahuron sa PNP ang katungod sa Bise Presidente sa pagpahayag sa iyang mga kabalaka sa seguridad, apan gikinahanglan ang hustong beripikasyon sa impormasyon.
Kahinumduman nga nagduha-duha si Duterte sa pagsulod sa Quezon City Regional Trial Court niadtong Sabado alang sa iyang pagpasaka og piyansa tungod sa tulo ka kaso sa grave threats, tungod sa iyang giingong kabalaka sa iyang seguridad.
Ang kaso naggikan sa iyang pahayag atol sa usa ka online press conference niadtong 2024, diin giingon niyang iyang gipapatay si President Ferdinand Marcos Jr., First Lady Liza Marcos, ug kanhing House Speaker Martin Romualdez kung adunay mahitabo kaniya.
