Gideklarar sa Philippine National Police (PNP) ug Philippine Coast Guard (PCG) nga nahimong hapsay ug han-ay ang pagsaulog sa Kalag-kalag 2025 sumala sa command center niini kagahapon sa Sabado, Nobyembre 1.
Sumala ni PNP acting chief Lt. Gen. Jose Melencio Nartatez Jr. nga walay natala nga mga insidente sa mga sementeryo, terminal, ug mga lugar nga puno sa tawo sa tibuok nasud.
Kapin sa 50,000 ka mga pulis ang gipakatap sukad Oktubre 30, uban sa pakigtambayayong sa AFP, PCG, ug mga lokal nga gobyerno.
Samtang, ang tigpamaba sa PCG nga si Capt. Noemie Cayabyab nagtaho nga kapin sa 700,000 ka mga pasahero ang mibiyahe agi sa mga pantalan gikan Oktubre 30 hangtod Nobyembre 1 nga mas ubos kaysa kapin sa 2 milyon nga mga pasahero atol sa Kalag-kalag 2024.
Sumala sa PCG, kadaghanan sa mga biyahero gikan sa Cebu, Batangas, ug Iloilo.
Dugang ni Cayabyab nga ang mga inspeksyon sa wala pa ang pag-departure gipakusog ug ang mga polisiya batok sa overloading kay hugot nga gipatuman.
Ang pagpadala sa mga rescue swimmers, medical teams, ug floating assets sa mga pantalan ug baybayon nagpadayon aron masiguro ang kaluwasan sa mga biyahero atol sa Kalag-kalag.
