CENTRAL VISAYAS- Gilusad sa kapolisan sa Central Visayas ang Emergency Alert Button App sa PRO7 Headquarters, Camp Sergio Osmeña Sr., Cebu City, karong adlawa Biyernes, Pebrero 14, 2025.
Matud pa sa pamahayag ni Police Brigadier General Redrico Maranan atol sa launching sa app nga gitumong niini nga mapadali ang pagresponde sa kapolisan sa bisan unsang insidente sa krimen, partikular na sa rehiyon sa Central Visayas, nga sa pagkakaron naglakip sa mga lalawigan sa Sugbo, Bohol, Negros Oriental, ug Siquijor.
Siya midugang nga kini nagtumong usab sa pagsiguro nga ang mga komersyal nga establisemento makasiguro sa ilang mga pamuhunan sa rehiyon, ug aron sa ingun mas mapadali ang pagsumpo sa krimen.
Gihatagan usab og gibug-aton sa opisyal nga, una na niyang gimandoan ang tanang City ug Provincial Police Offices sa pagsiguro nga ang tanang polis anaa sa kadalanan aron malikayan ang mga krimen nga mahitabo.
Kini nga programa unang gipatuman sa Luzon, diin napamatud-an nga epektibo kini sa pagpakunhod sa krimen sa lugar.
Ang nasangpit nga app mahimong ma-download sa bisan unsang matang sa smartphone (ma Android man o iOS) diin aduna kini mga importanteng impormasyon sama sa police station mapping ug police special units details kung ugaling adunay alarma nga tubagon, diin sulod sa pipila ka segundos makadawat ang mga estasyonan sa kapulisan og alerto nga maoy gamiton isip reference sa pagresponde.
