Gipahayag ni Pope Leo XIV ang iyang bug-os nga suporta alang sa usa ka temporaryo nga kasabutan tali sa Estados Unidos ug Iran nga nagtumong sa pagtapos sa nagpadayong gubat sa Middle East.
Sa usa pakighinabi kaniya didto sa Castel Gandolfo, Italy, gipadayag sa Santo Papa nga nagpasalamat siya sa Diyos tungod kay nakaabot sa usa ka kasabutan ang duha ka nasod, ug gilauman nga pormal kini nga ma-ratify karong adlaw nga Biyernes.
Sumala sa Santo Papa, mas maayo gayod nga sulbaron ang mga panagbangi pinaagi sa diyalogo ug negosasyon kaysa mobalik sa madugayong gubat.
Naglaum usab siya nga kini nga lakang mag-abli sa dalan alang sa permanente nga pagtapos sa tensyon sa rehiyon ug alang sa malungtarong kalinaw.
Kahinumduman nga si Pope Leo nahimong kritikal sa mga nangaging tensyon tali sa Amerika ug Iran, nga misangpot pa gani sa pagsaway kaniya gikan ni US President Donald Trump.
Bisan pa man niini, nagpabilin nga lig-on ug komitado ang Santo Papa sa iyang panawagan alang sa malinawon nga diyalogo ug panaghiusa aron mapugngan ang dugang nga kapintasan ug pagkawala sa kinabuhi sa mga inosenteng tawo.
