Gikondenar ni Pope Leo XIV niadtong Biyernes ang paggamit sa relihiyon aron i-justify ang “gubat,” “kapintasan,” o “panatisismo.”
Hinuon, iyang giawhag ang mga Katoliko nga ipadayag ang ilang pagtuo pinaagi sa pagpaningkamot nga maghiusa sa uban, “bisan unsa pa ang pagkatawo, nasyonalidad, relihiyon o personal nga mga panan-aw.”
Nanawagan ang Santo Papa sa mga magsisimba nga tugotan ang “diyalogo ug kooperasyon” tali sa lainlaing komunidad ug makita ang tawhanong dignidad sa matag usa, samtang gisaulog niya ang usa ka hinungdanong anibersaryo sa simbahan sa Turkey.
Miapil si Leo sa selebrasyon alang sa ika-1700 anibersaryo sa Konseho sa Nicaea sa lungsod sa Iznik sa amihanan-kasadpang Turkey, uban sa espirituhanong lider sa Eastern Orthodox nga mga Kristiyano, si Patriarch Bartholomew.
Sumala sa Vatican mitambong usab ang mga lider gikan sa lain-laing denominasyon, lakip ang Eastern Orthodox, Oriental Orthodox, mga Protestanteng simbahan, ug mga Eastern Catholic Churches.
Human niini, ang Santo Papa gikatakdang molupad paingon sa Istanbul aron magpahigayon og pribadong miting uban sa mga obispo sa Apostolic Delegation, ang pinuy-anan sa representante sa Holy See sa Turkey sa wala pa mabalhin ang kapital.
