Napakyas ang Portugal sa pagkuha sa kadaugan human makapuntos ang DR Congo, hinungdan nga nagtapos sa 1-1 nga tabla ang ilang panag-atubang sa Group K sa 2026 FIFA World Cup.
Unang nadasig ang Portugal sa ika-6 ka minuto human mapasulod ni João Neves ang usa ka header gikan sa pasa ni Pedro Neto aron ihatag ang nag-unang puntos alang sa iyang team. Apan, wala nagpapildi ang DR Congo ug padayon nga nangita og pamaagi aron makabawi sa dula.
Sa wala pa matapos ang first half, nakahimo og equalizer si Yoane Wissa pinaagi sa usa ka kusog nga header nga nagresulta sa kampo sa DR Congo ug nagtabla sa score ngadto sa 1-1. Sa second half, mas nagpakita og kumpiyansa ang DR Congo ug mas nahuptan nila ang bola, samtang ang Portugal naglisod na sa paghimo og mga opensa ug tsansa nga makapuntos.
Sa ika-55 ka minuto, naglaom ang Portugal nga mabalik kanila ang labaw sa dihang nakasulod sa goal ang nindot nga overhead kick ni João Cancelo. Apan, wala kini giila sa mga opisyal tungod sa offside nga posisyon sa wala pa kini narekord.
Nakita usab ang kapakyasan ni Cristiano Ronaldo sa tibuok dula, diin ang 41-anyos nga kapitan sa Portugal naglisod sa pagpangita og kahigayonan nga makagoal ug dayag nga wala nalipay sa dagan sa dula alang sa iyang team.
Sa pagsugod sa tunga-tunga sa dula, gipasulod sa Portugal si Francisco Conceição isip puli kang Bernardo Silva aron mapakusog ang ilang opensa. Apan bisan pa niini, nagpadayon ang kalig-on sa DR Congo ilabi na sa ilang paspas nga counter-attack nga gipangunahan ni Wissa, hinungdan nga nagpabilin ang 1-1 nga score hangtod sa pagtapos sa dula.
