Gipangulohan ni Presidente Ferdinand “Bongbong” Marcos, Jr., kauban ang First Family, ang selebrasyon sa ika-128 nga anibersaryo sa Kagawasan ug Pagkanasod sa Pilipinas nga gihimo didto sa Rizal National Monument sa Dakbayan sa Manila karong adlawa, Hunyo 12.
Sumala sa Presidential Communications Office (PCO), nangulo ang Presidente sa dungan nga pagpataas sa nasodnong bandila ug pagpahimutang og wreath-laying aron pasidunggan si Dr. Jose Rizal ug ang tanang mga bayani sa nasod nga nagbuwis sa ilang kinabuhi alang sa kagawasan sa Pilipinas.
Sa iyang opisyal nga mensahe, nanawagan si Marcos sa mga Pilipino nga mokuha og inspirasyon gikan sa kasaysayan ug magtinabangay alang sa kaayohan sa tanan.
Gitataw sa Presidente nga ang kagawasan dili lang usa ka “panulondon” kondili usa ka dako nga responsibilidad nga angay ipadayon sa matag henerasyon.
Gipahinumdoman usab sa Presidente ang publiko ug ang mga opisyal sa gobyerno nga ang tinuod nga lider mao kadtong andam mosakripisyo sa ilang kaugalingong interes alang sa kaayohan sa kinatibuk-ang dapit ug sa nasod.
Gihangyo sa Presidente ang tanang Pilipino nga gamiton ang mga pagtulun-an sa kasaysayan aron mapalambo ang nasod ug mapanalipdan ang kasarinlan, ilabi na nga ang Pilipinas padayon pa gihapon nga nakigbugno sa mga nag-unang problema sama sa korapsyon, pagkabahinbahin sa politika, ug kakabos.
