Nanawagan si kanhi Surigao del Norte Rep. Rep. Ace Barbers sa Department of National Defense, Philippine Navy ug Philippine Coast Guard nga susihon ug bantayan pag-ayo ang gitaho nga presensya sa upat ka mga barkong panggubat sa China duol sa Hilabaan, Eastern Samar.
Sumala ni Barbers, basi sa impormasyon nga nakuha, ang mga barko nga nakita naglakip sa duha ka Luyang III-class guided-missile destroyer ug duha ka Jiangkai II-class frigate.
Gipasiugda ni Barbers nga ang ilang presensya dili angay ibaliwala tungod kay ang nahisgutang mga barko makahimo sa air defense, long-range strike ug anti-submarine warfare.
Busa, gihangyo niya ang mga awtoridad nga mahibal-an kung asa ang mga barko, asa sila paingon ug unsa ang ilang gibuhat, lakip na kung ang ilang mga operasyon nahiuyon ba sa internasyonal nga balaod.
Gipasalig ni Barbers nga ang pagbantay wala magpasabot nga pagpanghagit. Miingon siya nga ang Pilipinas kinahanglan nga mahibalo sa bisan unsang mga kalihokan sa mga langyaw nga barkong panggubat duol sa teritoryo ug katubigan niini.
Tungod niini, giduso pag-usab ni Barbers ang pagtukod og usa ka naval installation sa Surigao del Norte ubos sa Enhanced Defense Cooperation Agreement (EDCA) aron mapalig-on ang seguridad sa silangang bahin sa nasud.
Sa pagkakaron, adunay siyam ka mga designated EDCA sites sa Pilipinas.
Mao kini ang mosunod: Basa Air Base (Pampanga); Fort Magsaysay Military Reservation (Nueva Ecija); Lumbia Airport / Air Base (Cagayan de Oro); Antonio Bautista Air Base (Puerto Princesa, Palawan); Benito Ebuen Air Base (Cebu); Naval Base Camilo Osias (Sta. Ana, Cagayan) Lal-lo Airport (Cagayan) Camp Melchor dela Cruz / Aquino (Gamu, Isabela); ug Balabac Island (Palawan).
