Gitaho sa Police Regional Office 7 (PRO7) ang dakong pagkunhod sa ‘focus crimes’ nga anaa sa 31.14% sa tibuok Central Visayas gikan Enero 1 hangtod Mayo 31, ning tuiga kon itandi sa samang panahon sa miaging tuig.
Kining talagsaon nga pagkunhod tungod sa gipakusog nga police visibility sa PRO7, community-oriented policing strategies, ug sustained law enforcement operations, ug tanang ubos sa dinamikong pagpangulo ni Regional Director PBGen. Redrico Maranan.
Sumala sa datos gikan sa PNP’s Crime Information Reporting and Analysis System (CIRAS), ang focus crime incidents mius-os gikan sa 1,400 ka kaso niadtong 2024 ngadto sa 964 niadtong 2025, 436 mas gamay nga kaso.
Kini nagpakita nga ang pagkunhod gumikan sa pagkaepektibo sa mga inisyatibo batok sa krimen sa PRO7, estratehikong pagdeploy sa mga personahe, ug lig-on nga kolaborasyon sa mga local government units ug mga stakeholders sa komunidad.
Ang Focus Crimes kay naglangkob sa pagpatay, homicide, physical injuries, rape, robbery, theft, ug carnapping.
Hinungdan nga gidayeg ni PBGEN Maranan ang dedikasyon sa mga personnel sa PRO7 ug nagpasalamat sa publiko sa ilang padayon nga suporta ug kooperasyon sa pagpatunhay sa kalinaw ug kahusay.
Dugang pa niini nga dili lang kini kalamposan sa PRO7 tungod kay usa kini ka kolektibong kadaugan sa katawhan sa Central Visayas.
