LARENA,SIQUIJOR- Gipangunahan ni Presidente Ferdinand R. Marcos Jr. ang ceremonial switch-on sa mga bag-ong diesel power plants sa probinsya sa Siquijor, nga nahimutang sulod sa main office compound sa Province of Siquijor Electric Cooperative (PROSIELCO) sa lungsod sa Larena, karung adlawa September 5, 2025.
Ang maong kalihokan usa ka dakong lakang sa pagtubag sa nagpadayong krisis sa kuryente sa isla, nga misangpot sa pagdeklara og state of calamity sa tibuok probinsya.
Sa iyang mensahe, gimandoan sa Presidente ang mga ahensya nga ibalik ang normal nga serbisyo sa kuryente sa dili pa matapos ang tuig.
Personal nga nakigsulti si National Electrification Administration (NEA) Administrator Antonio Mariano Almeda kang Presidente Marcos ug Department of Energy (DOE) Secretary Sharon Garin kabahin sa kapasidad ug mga advanced features sa maong mga pasilidad nga gipatukod aron masiguro ang mas kasaligan ug lig-on nga power supply sa Siquijor.
Ang pag-operate sa mga bagong planta gilauman nga makahatag og dali ug epektibong solusyon sa kakuwang sa suplay sa kuryente sa isla, nga dugay nang gisang-at nga problema sa mga residente ug negosyante.
