Mipahibalo si Mongolian President Ukhnaa Khurelsukh sa iyang pagbiya sa puwesto adlaw nga Martes, Nobyembre 17, human malambigit sa mga akusasyon sa korapsyon ug hulga nga ipa-impeach siya.
Kalabot niini, nagpagawas og pahayag ang oposisyon nga Democratic Party niadtong Lunes diin giakusahan si Khurelsukh sa korapsyon ug gihangyo nga mobiya sa iyang katungdanan isip pangulo o atubangon ang impeachment sa Parlamento.
Matud ni Khurelsukh, walay basihan ang maong mga akusasyon batok kaniya ug mipili na lamang siya nga mobiya sa puwesto aron mapamatud-an ang kamatuoran ug malimpyohan ang iyang pangalan.
“I believe that it is in the interests of justice for the Head of State to relinquish his duties and establish the truth,” matud sa pangulo.
Gidugang pa niya nga pormal na niyang ipahibalo ang iyang pagbiya sa katungdanan isip pangulo sa Mongolia ug itugyan nalamang niini sa awtoridad ang mga tawo nga nagdaot sa iyang dungog aron mapasig-uli ang iyang maayong pangalan.
Sa miaging mga bulan, nakasinati og kagubot sa politika ang Mongolia, lakip na ang tensiyon sulod sa nagdumalang partido nga Mongolian People’s Party o MPP.
Nahitabo usab ang nagkadaiyang demonstrasyon ug protesta nga gipangulohan sa mga kabatan-onan sa ‘Ulanbataar’ tungod sa ilang pagkadismaya sa mga adunahang ‘elite’ ug sa giingong kaylap nga kakulang sa hustisya sa nasud.
Nakatakda nga mopuli kaniya isip pangulo sa Mongolia si Parliament Speaker Sandag Byambatsogt, nga miyembro usab sa MPP, sulod sa upat ka bulan samtang naghulat sa pagpahigayon sa presidential elections.











