Gitudlo isip opisyal nga Chief Minister sa Bangsamoro Autonomous Region in Muslim Mindanao (BARMM) Si Abdulraof “Sammy Gambar” Macacua, human nakakuha og 51 ka boto sa parliament election nga gipahigayon niining Biyernes, Oktubre 30, 2026.
Kining makasaysayanong eleksyon nagtapos sa pito ka tuig nga transisyon, nga nagtimaan sa pormal nga pagbalhin gikan sa gitudlo nga interim authority—ang Bangsamoro Transition Authority (BTA)—ngadto sa usa ka regular ug demokratikong napili nga gobyerno sa rehiyon, subay sa Bangsamoro Organic Law (BOL) (Republic Act No. 11054).
Ang Bangsamoro Organic Law, nga gi-ratipikar niadtong 2019, nagtukod sa BARMM isip resulta sa mga dekada nga negosasyon sa kalinaw tali sa gobyerno sa Pilipinas ug sa Moro Islamic Liberation Front (MILF), uban ang tumong nga hatagan og mas dakong awtonomiya ug katungod sa pagdesisyon sa kaugalingon ang katawhang Bangsamoro.
Si Macacua, nga nagrepresentar sa Bangsamoro Federalist Party (BFP), mipildi sa kanhi interim Chief Minister nga si Ahod “Al Haj Murad” Ebrahim, kinsa nakakuha lamang og 27 ka boto gikan sa 80 ka miyembro sa Bangsamoro Parliament.
Isip usa ka mahinungdanong tawo sa proseso sa kalinaw, si Macacua kaniadto nagsilbi isip Chief of Staff sa Bangsamoro Islamic Armed Forces (BIAF) sa Moro Islamic Liberation Front (MILF).
Nagrepresentar siya sa ika-3 nga distrito parlamentaryo sa Maguindanao del Norte ug nagsilbi usab kaniadto isip interim Chief Minister ug acting provincial governor.
Isip unang interim Chief Minister, si Ebrahim adunay dakong papel sa pagpangulo sa Bangsamoro Transition Authority (BTA) sukad sa pagsugod niini, diin iyang gidumala ang mga unang hugna sa pagtukod sa mga institusyon ug ang pagpatuman sa kasabutan sa kalinaw.
Ang mga opisyal sa national goverment, mga gobernador, mga tigpasiugda sa kalinaw, ug mga foreign diplomat mitambong sa inagurasyon aron saksihan ang pormal nga paglingkod sa katungdanan sa mga regular nga miyembro sa parlamento.
Samtang, ang kapulisan ug militar nagpatuman sa mas hugot nga mga lakang sa seguridad sa Cotabato City alang niining okasyon, nga miresulta sa temporaryong mga restriksyon sa paglihok ug mga kalihokan sa negosyo sa mga residente.
