Naangol ang usa ka lalaki human sa gituohang pagbuto sa Purok Amirol, Barangay Mother Kalanganan, Cotabato City, mga alas 8:00 sa gabii, Setyembre 13, 2026.
Giila ang biktima sa alyas nga “Zai,” usa ka residente sa Poblacion 1, Cotabato City.
Sumala sa pasiunang imbestigasyon sa Police Station 4 sa Cotabato City Police Office, ang biktima naghulat sa iyang construction foreman sa maong lugar sa dihang nakakita siya og kalit nga puti nga hayag ug nakadungog og kusog nga pagbuto.
Tungod niini, natumba ang biktima sa yuta ug nasuta sa ulahi nga nakaangkon siya og mga samad.
Samtang, nagpahigayon og clearing operation ang Cotabato EOD team aron masiguro nga luwas ang lugar.
Samtang sa dili pa dugay adunay laing gitaho nga kusog nga pagbuto mga alas 8:10 sa Datu Udtog Matalam, Malagapas, Barangay Rosary Heights 10, Cotabato City.
Ang mga personahe sa Police Station 2, lakip na ang mga duty investigator nga gipangulohan ni Station Commander PMAJ Tugaya Z. Alfonso, daling miresponde human makadawat og taho gikan sa usa ka nagpakabana nga residente.
Pag-abot sa lugar, gikumpirmar sa mga awtoridad nga adunay nahitabong pagbuto. Basi sa pasiunang imbestigasyon, gituohang gikan sa tapok sa basura ang pagbuto; nakit-an usab ang mga nagkatag nga debris o mga tipik sa maong lugar.
Sa pagkakaron, walay gitaho nga namatay o naangol kalabot sa maong insidente, ug nagpadayon ang imbestigasyon sa mga awtoridad aron masuta ang hinungdan sa pagbuto ug mailhan kung kinsa ang responsable sa maong insidente.
