PROVINCE OF BOHOL-Gikompirmar sa Police Regional Office 7 nga mga police ang nakuhaan sa usa ka viral video sa Bohol human kini giangkon nga sakop kini sa kapulisan sa Probinsya.
Diin upat ka mga police ang nadestino sa lungsod sa Panglao, Probinsya sa Bohol ang gipasanginlan nga mikalit og sulod sa usa ka balay sa lungsod sa Dauis niadtong Sabado, Hulyo 20, 2024 ug giingong nanion og armas.
Apan, giklaro ni Police Lieutenant Colonel Gerard Ace Pelare ang tigpamaba ni Police Brigadier General Anthony Aberin hepe sa kapulisan sa Central Visayas nga basi sa taho sa kapulisan sa Bohol, lehitimo ang maong operasyon.
Matud ni Pelare nga adunay gilusad nga anti-illegal drug operation ang kapulisan sa Panglao diin wala nila madakpi ang target apan ila nalang kini nga pasakaan og kaso sa kalapasan sa Republic Act 9165 ngadto sa korte.
Lakip sa pasakaan og kasong Obstruction of Justice sa Panglao PNP ang pamilya nga mibabag sa mga kapulisan.
Apan, tungod sa mitumaw nga pasangil batok sa mga police, gikatahong adunat himoon nga imbestigasyon ang Bohol PNP.
Samtang magpadayon ang administrative ug criminal investigation nga relibohan lang una ang duha ka police nga mao’y nakita sa video nga ila nang nailhan ug gibalhin sa Bohol Police Provincial Office aron dili maka empluwensya sa gilusad nga imbistigasyon.
Sama sa naandan hatagan nila og proseso ang maong gisumbong nga mga police aron makasabot sila sa maong insidente.
Kon gani mapatud-an sa imbestigasyon nga adunay kalapasan nga nahimo ang maong mga kapulisan kay pahamtangan kini og administrative ug criminal sanction.
Gipasalig ni Pelare dili modupa ang kadagkoan sa kapulisan kung adunay nahimong kalapasan ang ilang personnel.
Paminawon una nila ang tanang pamahayag sa duha ka habig ug subayon kung nasunod ba sa mga police ang Police Operational Procedure atol sa ilang anti-illegal drug operations.
