CEBU CITY — Mihatag ang Police Regional Office (PRO)-7 og hinabang ngadto sa 500 ka mga residente kagahapon sa Sitio Kakha, sa Brgy. Talalac, lungsod sa Sta. Catalina, Negros Oriental.
Kini pinasubay na sa programang National Task Force to End Local Communist Armed Conflict (NTF-ELCAC) sa PNP.
Natayming usab kini sa pormal nga pag-abli sa unang police substation sa nahisgutang lugar.
Nakahigayon usab ang mga residente sa pag-avail sa medical assistance atol sa gipahigayon usab nga medical mission.
Matud ni PRO-7 Director Brig. Gen. Ronnie Montejo nga kabahin ang nahisgutang mga programa aron molungtad pa ang relasyon niini ngadto sa komunidad.
Hinungdan nga gihangop sa mga residente ang mga lakang sa PRO-7, subay na sa tinguha nga kalikayan ang mga komunidad sa Negros Oriental batok sa insurhensiya ug mga rebeldeng komunista.
