CENTRAL VISAYAS-Nipasalig ang Police Regional Office 7 (PRO 7) nga mokooperar sa nagpadayong imbestigasyon sa Senado sa kaso sa pagpatay kang Degamo human nitumaw ang mga ngalan sa pipila ka opisyal sa kapulisan nga kanhi nadestino sa Negros Oriental Police Provincial Office (NOPPO).
Ang maong mga opisyal sa kapolisan mao sila si Colonel Arnel Banzon, kinsa nahimong hepe sa NOPPO gikan Mayo 27, 2020 hangtod Oktubre 3 ug Cebu Police Provincial Office Chief Colonel Rommel Ochave, kanhi hepe sa Criminal Investigation and Detection Group sa Central Visayas.
Kini subay sa gibutyag ni Pamplona Mayor Janice Degamo, asawa ni anhing Negros Oriental Govenor Roel Degamo, atol sa pagdungog sa Senado nga ang kapulisan nagpakita nga daw ang iyang bana maoy nimando sa pagpatay sa usa ka komentarista sa radyo sa Dumaguete City sa Mayo 5, 2020.
Nihatag og gibug-aton si Lieutenant Colonel Gerard Ace Pelare, tigpamaba sa PRO 7 Chief Police Brigadier General Anthony Aberin,nga ang pagngalan nila ni Banzon ug Ochave wala magpasabot nga nakahimo sila og krimen tungod kay ang Senate inquiry gihimo agig tabang sa balaod ug ang duha usab motubaga sa mga pasangil batok nila.
Gipasabot ni Pelare nga adunay mga pangutana sa Senate probe nga kinahanglang tubagon nilang Banzon ug Ochave aron mahatagan og katin-awan ang imbestigasyon.
Hinuon siya niingon nga walay epekto ang maong isyu sa moral sa kapolisan sa Central Visayas.
