Gikatakdang mo-host ang Provincial Government sa “Cebu International Investment Summit 2026” ubos sa pagpangulo ni Cebu Governor Pamela Baricuatro, diin magsugod og Enero 12 hangtud sa 16, isip kabahin sa mga paningkamot sa pagdani sa lokal ug langyaw nga mga pamuhunan ug pagpahimutang sa probinsya isip usa ka importanteng sentro sa ekonomiya sa rehiyon sa Asia-Pacific.
Gipahibalo ang giplanong summit atol sa usa ka media briefing sa Kapitolyo nga gitambongan nila ni Investments and Promotions Officer Paolo Uy, global strategist Dr. Brian To, ug 1Tahanan Party-list Rep. Nathaniel Oducado.
Gitawag nga usa ka una nga inisyatibo alang sa probinsya, ang CIIS 2026 diin nagtumong sa pagdani og 200 ngadto sa 250 ka internasyonal nga CEO, founder, chairperson, ug senior decision-makers ug pag-promote sa Cebu isip “Asia Pacific’s economic epicenter” ug usa ka strategic basi alang sa regional expansion, manufacturing, services, ug innovation.
Gilauman usab ang mga target delegations gikan sa South Korea, Singapore, Japan, China, Taiwan, Oman, ug Saudi Arabia.
Ang summit gikatakda sa dili pa ang Sinulog Festival, nga magtugot sa mga partisipante nga moapil sa mga high-level nga diskusyon bahin sa public-private partnerships (PPP) ug joint ventures sa dili pa makasinati sa kultural nga pasundayag sa Cebu.
Giorganisar sa Cebu Provincial Investment and Promotions Division (CPIPD), kauban ang Enterprise Economic Council (EEC), ang summit nagtinguha nga iposisyon ang Cebu lapas sa turismo ug ipasiugda ang mga oportunidad sa “tinuod nga ekonomiya,” lakip ang manufacturing, healthcare, edukasyon, heavy industry, autoparts, defense-support industries, textiles, micromanufacturing, hospitality, ug climate-resilient infrastructure.
