CEBU CITY-Gibutyag ni Cebu Provincial Governor Gwendolyn Garcia nga epektibo karong petsa 27, adlaw nga Biyernes dili na mudawat ang Probinsya sa Sugbo o mga pasahero gikan sa laing nasud nga musulod sa Cebu nunot sa hulga sa Coronavirus Disease 2019.
Nagpatawag na usab ang gobernadora og emergency meeting kauban ang mga mayor sa probinsya Sugbo nga ipahigayon karong adlawa aron hisgutanan ang deklarasyon nga ipaubos sa State of Emergency ang Cebu ug magpatuman og Enhanced Community Quarantine o lockdown.
Matud ni Garcia, nga kinahanglan niini nga makuha ang opinyon sa mga mayor kalabot sa mga tukmang lakang ug madungog ang ilang sitwasyon aron nga malikayan ang pagkuyanap pa sa gikalisangang coronavirus.
Apan gitino ni Garcia nga ang si kinsa man ang gusto nga mugawas ang mamahimo pa gihapon nga makagawas sa Sugbo apan dili na kini makabalik.
Padayon usab matud pa nga mu-operate ang airports alang sa repatriated flights, samtang importante usab ang pagsulod sa mga cargos.
Kini ang rason nga makig-alayon ang gobernadora sa mga mayor sa dagkong siyudad sa Sugbo aron nga dungan nga maimplementar ang iyang plano nga lock down.
