Supak ang mga progresibong grupo sa Sugbo, sa planong pagpatukod og proyekto nga Waste to Energy Facility sa Dakbayan sa Sugbo, hilabi na sa sugyot ni Cebu City Vice Mayor Tomas Osmena, aron sa pagtubag sa problema sa basura.
Matud ni Teody Navea, nga babagan nila ang pagpatukod sa bisan unsang matang sa proyekto sa pagsunog og basura gumikan kay makadaot kini sa kinaiyahan ug nakalapas kini sa Clean Air Act.
Sigon niini nga padayon ang ilang gipahigayon nga signature campaign alang sa pagsupak sa planong pagpatukod og WTE facility o Incenirator sa mga opisyales sa Dakbayan, kini gumikan kay bisan pa og adunay susamang programa dili parehas og kapasidad ang ubang nasud og ang Pilipinas.
Gihimug-atan ni Navea nga ang rason nganung mitumaw ang grabeng problema sa basura hilabi na sa pagdahili sa Binaliw landfill, gumikan sa wala pagsunod og tarung sa balaod nga nakalatid sa pag-segregate sa mga basura og pagtarung og atiman sa mga landfill facility.
Dugang usab niini nga buhaton sa grupo ang tanan nga mga posibleng lakang aron mapasaka ang mg reklamo maylabot sa pagpugong sa pagpatukod sa WTE og Incenarator Facility.
