Gidaog sa prosekusyon sa Kamara ang duha ka sunud-sunod nga motion human gipaboran sa impeachment court sa Senado ang ilang hangyo nga mag-take judicial notice sa miaging mga tigum sa Kamara ug ibalhin ang mga markang exhibit alang sa affidavit ni Arturo Lascañas.
Giaprobahan ni Senate President ug Presiding Officer Francis “Chiz” Escudero ang hangyo sa prosekusyon nga ilhon ang opisyal nga kinaiya ug rekord sa mga imbestigasyon sa House Committee on Good Government and Public Accountability ug sa Committee on Justice bahin sa isyu sa confidential funds ni Bise Presidente Sara Duterte.
Bisan pa niini, gipahinumdoman sa korte nga ang desisyon nagpasabot lamang nga naglungtad ang maong mga rekord ug opisyal nga gihimo ang mga hearing, ug wala kini nagpasabot nga tinuod na dayon ang mga alegasyon o testimonya.
Gawas niini, gisalikway usab sa korte ang pagsupak sa depensa ug gitugotan ang prosekusyon nga ibalhin ang exhibit markings ngadto sa certified true copies sa affidavit ni Lascañas, diin ang maong affidavit kabahin sa gihimong imbestigasyon sa National Bureau of Investigation (NBI) bahin sa pasangil batok kang Duterte, diin nalambigit ang alegasyon sa Davao Death Squad (DDS).
Gipatin-aw ni Escudero nga ang maong mga lakang puros procedural lamang ug wala magpasabot nga gidawat na sa korte ang kamatuoran sa mga dokumento, diin kinahanglan pa kining pamatud-an ug moagi sa saktong pag-usbaw sa sunod nga hugna sa pagdungog.
