Gikasab-an ni Senador Pia Cayetano si Rep. Gerville Luistro, ang nanguna nga piskal sa Kamara, sa nagpadayon nga impeachment trial batok kang Bise Presidente Sara Duterte.
Mihatag si Cayetano sa iyang bug-at nga pamahayag human gisusi ang affidavit sa kanhi miyembro sa Davao Death Squad nga si Arturo Lascañas nga gipresentar sa prosecution pinaagi sa NBI.
Matud pa sa senadora, wala nakasunod sa Rules of Evidence ang prosecution tungod kay ang maong affidavit dili notarized ug wala usab mapamatud-i ang legal nga kredibilidad niini.
Napugos usab sa pag-angkon si Rep. Luistro nga wala silay napresentar nga ebidensya nga nagpamatuod nga tinuod ug authentic ang maong dokumento.
“Do your job and present the proper witness and the proper documentation to do that. Do your job,” matud pa ni Cayetano nga direktang nagpahinumdom sa prosecution panel.
Gidugang pa ni Cayetano nga dili angay magpakita ug mga dokumento nga kaduda-duda ang pagka-admissible tungod kay makaimpluwensya kini sa panlantaw sa mga senator-judges.Padayon pa gihapon ang pagdungog sa kasong impeachment batok sa Bise Presidente.
