METRO MANILA-Nakig-alayon ang Philippine Statistics Authority (PSA) sa National Bureau of Investigation (NBI) human gitaho sa NBI nga 200 ka Chinese nationals ang nakakuha og peke nga birth certificates sa Davao del Sur.
Sa usa ka pamahayag, ang PSA nagkanayon nga nihimo na sila og verification ug mihatag sa gikinahanglang impormasyon kalabot sa birth records nga kasamtangang giimbestigahan sa NBI, samtang ang civil registrar nga konektado sa isyu gikatahong gitangtang sa iyang puwesto.
Gihatagan og gibug-aton sa PSA nga ang rehistradong birth records gikan sa Local Civil Registry Office sa Sta. Cruz, Davao del Sur.
Sa samang higayon, gihingusgan sa PSA nga ilang gigukod ug gitutokan ang nasangpit nga isyu ug giawhag ang publiko nga i-report ang bisan unsang aktibidad nga may kalabotan sa pagpalsipikar sa mga dokumento.
Kahinumduman nga usa ka Chinese national ang nasikop niadtong miaging Martes samtang nisuway sa pagkuha og Philippine passport gamit ang peke nga birth certificate.
