CEBU CITY — Giimbestigaran karon sa PNP ang pagpamanhig-patay sa usa ka police officer sa Brgy. Guiwanon, Maribojoc, sa lalawigan sa Bohol.
Giila ang biktima nga si Police Corporal Arnel Bayot, nagpuyo sa lungsod sa Tubigon, ug na-assign sa Provincial Mobile Force Company sa Ubay, Bohol.
Samtang samdan usab ang asawa niini nga si Richel, anaa sa hingkod ang panuigon.
Matud sa acting chief sa Maribojoc PNP nga si Police Captain Fortunato Villafuerte nga gipauwanan og bala sa mga armadong kalalakin-an ang sakyanan ni Bayot kuyog ang asawa niini sa sulod.
Hinungdan nga nakaangkon ang pulis og mga samad-pinusilan sa iyang likod samtang naigo usab si Richel sa iyang paa ug bukton.
Gidala dayon sa tambalanan si Corporal Bayot apan gideklarar kini nga dead on arrival samtang nagpaalim pa ang asawa human nakaangkon og samad-pinusilan.
Narekober sa kapulisan ang 21 ka empty shells sa M-16 nga armas.
Sa kasamtangan, gipalawman pa sa PNP ang imbestigasyon sa pagpang-ambush samtang gipangita pa ang mga wala mailhing gunmen ubos sa hot pursuit operation.
