Gipusil ug gipatay sa usa ka pulis ang iyang asawa, nga usa ka magtutudlo sa kindergarten, diin siya nagtrabaho sa probinsya sa Chonburi, habagatan-sidlakan sa Bangkok, Thailand.
Bisan pa sa maong trahedya, gipahayag sa mga opisyal nga luwas ang tanang mga bata nga naa sa maong pasilidad.
Sumala ni Sayan Klomaon, ang tsirman sa Nong Pla Lai sub-district council, ang pulis miabot sa eskwelahan mga alas 10:30 sa buntag ug nakigsulti sa iyang asawa sa gawas sa classroom sa wala pa kini gipusil.
Tungod kay sa gawas man kini nahitabo, walay bisan usa ka estudyante ang nakakita sa aksidente. Human sa pagpamusil, nibalik dayon ang suspek sa iyang balay diin kasamtangan siyang gi-negosasyon sa mga pulis alang sa iyang pagsurender.
Gikumpirma usab ni Chonburi Governor Naris Niramaiwong sa usa ka pahayag nga ang tanang 44 ka mga bata, uban sa tulo ka mga magtutudlo ug tulo pa ka mga kawani sa eskwelahan, luwas nga gipabakwit.
Gisirad-an dayon ang kindergarten ug gilauman nga ang gobyerno mohatag og sikolohikal nga suporta sa mga bata ug kawani nga nakasaksi sa insidente.
Sa karon, ang motibo sa krimen wala pa matino samtang nagpadayon ang negosasyon.
