CEBU CITY-Patay ang usa ka pulis human nga napusilan sa dihang giholdap niini ang usa ka headguard sa usa ka subdivision sa Baranggay Tisay niining dakbayan.
Naila ang namatay nga si Police Corporal Jobie Antipolo kinsang nasuta nga nag AWOL na sa serbisyo.
Samtang nagpaalim sa tambalanan ang head guard nga giholdap nga giilang si Edwin Velos.
Matud pa sa usa ka witness nga habal-habal driver nga wala nagpahingan nga nasugatan matud pa niya ang pulis ug ang angkas niini sa motor nga nagsunod sa head guard.
Kalit lang matud pa nga gipusil niini ang head guard ug sa dihang nahagba gikuha dayon sa angkas sa pulis ang motor niini.Apan kalit lang matud pa nga dunay buto-buto ug nakit-an nalang niini nga nahagba patay na ang holdaper nga kanhi pulis.
Una usab nga gitoohang gi-unay sa kaubang tulisan ang naasoy nga pulis.
Sa nagpadayon usab nga imbestigasyon, nagkanayon si Police Major Henricks Bancoleta, ang hepe sa Labangon Police Station nga basi sa uban pang nakakita, duna matud pay unidentified person nga namusil sa duha ka tulisan apan ang naigo patay mao si Antipolo.
Wala pa hinoon natino kung pila kabook ang mamumuno.Apan gitoohan usab nga samdan ang lain pang tulisan nga nakaikyas. Subay niini gipaalerto na sa kapulisan ang mga tambalanan kung duna bay magpatambal nga muhaom sa ilang deskripsyon ilabina nga nagdala kini sa motor sa gitulis nga head guard.
Nasayran nga dunay kwarta sa U-box sa maong motor nga nagkantidad og 500,000 pesos para matud pa i-sweldo sa mga gwardiya nga sakop sa Agency Sarsaleso Security.
