CEBU CITY — Nakatala og unang kaso sa COVID-19 ang hanay sa kapulisan sa Sugbo human nga adunay nag-positibo sa coronavirus.
Kini ang gikumpirmar ni Cebu City Police Office (CCPO) Director PCol. Josefino Ligan, diin nagpadayon ang contact tracing karon sa otoridad alang sa pagsusi kung diin partikular posibleng nakuha sa pulis ang maong virus.
Matod ni Pcol Ligan nga gikan na-assign sa nagkadaiyang Quarantine Control Point ang maong police personnel og bag-o kini nga na-assign sa Barrio Luz nga gipaubos karon sa lockdown gumikan sa daghang kaso sa Covid-19.
Hinu-on baskog matod pa ang pulis og asymptomatic kini sa maong virus.
Segon kang Ligan nga naka-isolate na kini karon og gihatagan na sa insaktong pag-alima batok sa coronavirus.
Gisiguro usab ni Ligan nga gipaubos na sa monitoring og isolation ang uban pang mga pulis nga nakauban sa nag-positibo.
Kahinumduman nga moabot sa 40 ka mga pulis ang gi-swab test, 39 niini ang negatibo samtang usa ang positibo sa virus.
