Bisan pa sa nagpadayong imbestigasyon sa pagbaligya sa PWD identification cards sa dakbayan sa Sugbo, makadawat gihapon ang mga kwalipikadong person with disability (PWDs) sa ilang financial assistance gikan sa kagamhanang lokal sa Sugbo sa ikatulong semana sa Hunyo ning kasamtangang tuig.
Naglakip ang maongcash assistance sa mga buwan sa Abril, Mayo ug Hunyo, nga nagkantidad ug P3,000 nga ma-apod-apod sa umaabot nga Hunyo 14 ug 15 sa mga nagkadaiyang barangay sa dakbayan.
Una nang gibutyag ni Cebu City Councilor James Anthony Cuenco ang scam nga naglambigit sa pagbaligya sa PWD IDs nga gi-isyu sa City Government ngadto sa mga tawong lig-on og lawas sa kantidad nga P2,000 ngadto sa P4,000.
Matod niya adunay panahon ang Department of Social Welfare and Services (DSWS) sa paghuman sa pag-audit sa mga benepisyaryo.
Si Cuenco niingon nga niadto na siya sa buhatan sa DSWS sa Barangay Labangon niadtong Lunes, Hunyo 3, ug gimanduan ang mga kawani nga i-audit ug i-verify ang mga PWD ID ug makompleto kini sulod sa usa ngadto sa duha ka semana.
Usa ka executive session ang ipahigayon karong Huwebes, Hunyo 6, nga mag-imbitar sa mga empleyado sa City Hall nga posibleng malambigit sa PWD ID scheme.
Sa iyang paghatag sa iyang privilege speech niadtong Mayo 22, si Cuenco niduso og mosyon nga nagdapit nila ni Cerj Germudo, John Tolentino ug Jay-R Cam, pulos gikan sa buhatan ni suspended Cebu City Mayor Michael Rama, ug JJ Laurel, kanhi nadistino sa DSWS apan karon anaa na sa Road Management Authority, aron mahatagan ug katin-awan ang mga alegasyon.
Sa pakighinabi kang Portia Basmayor,kinsa ang pangu sa DSWD niingon nga wala siyay ideya nga gibaligya ang mga PWD ID tungod kay niadtong Marso 11 lang siya milingkod sa katungdanan.
Si Basmayor niingon nga ang pagbaligya sa PWD IDs posibling nahitabo sa miaging tuig.
