CEBU CITY — Gikatakdang ablihan karong semanaha ang usa ka quarantine facility sa Sacred Heart School – Ateneo de Cebu, isip usa sa nga COVID-19 Bayanihan Centers sa dakbayan sa Sugbo.
Sa impormasyong nakuha gikan sa Bayanihan Cebu PH, magamit ang Bayanihan Cebu Field Center (BCFC) alang sa mga pasyenteng adunay mild symptoms sa COVID-19 apan walay igong kapasidad alang sa self-isolation.
Matud ni Edmun Liu sa Bayanihan Cebu PH, gipadagan ang maong quarantine facility sa Department of Health (DOH)-7 ug sa Office of the Presidential Assistant for the Visayas (OPAV).
Kung mahuman na ang mga finishing touches, ablihan ang maong pasilidad karong Miyerkules, Abril 22.
Alang sa kaluwasan sa komunidad, adunay negative air pressure facility ang quarantine area aron sa ingon dili daling mokatap ang virus sa gawas.
Una niini, na-inaugurate ang maong pasilidad sa SHS ug gitambongan kini nilang Cebu City Mayor Edgardo Labella, OPAV Sec. Michael Diño, ug uban pa.
