Mobalik sa natad sa tennis ang Spanish superstar nga si Rafael Nadal alang sa usa ka exhibition game, bisan pa man sa iyang opisyal nga pagretiro sa kompetisyon.
Gikatakda nga makigbatok si Nadal sa umaabot nga 2027 MGM Slam nga ipahigayon sa Las Vegas, Estados Unidos karong Pebrero 28, 2027.
Ang katapusang pagpakita sa 22-time Grand Slam champion sa maong kalihokan nahitabo niadtong 2024, diin iyang gikaatbang ang iyang isigka-Espanyol ug world star nga si Carlos Alcaraz.
Sa nakalabay lang nga semana, misalmot siya sa “Rafa Nadal Academy Slam,” diin nakigbahin siya sa mga doubles tiebreaker kauban ang mga legend sa tennis sama nila ni Andy Murray, Dominic Thiem, Fabio Fognini, Carlos Moyá, David Ferrer, Marat Safin, ug Richard Gasquet.
Gipanglantawan usab nga moduwa sa 2027 MGM Slam ang iyang dugay nang kaatbang ug Swiss tennis icon nga si Roger Federer, kinsa nagpadayag sa iyang dakong interes nga mosalmot sa mga exhibition match.
Tungod niini, dako ang posibilidad nga mag-uban ug magpares silang Nadal ug Federer alang sa usa ka kulbahinam nga doubles match nga gipaabot sa mga fans sa tibuok kalibutan.
