CEBU PROVINCE- Patay ang giingong rapper human gipusil sa wa mailhing gunman.
Ang insidente nahitabo alas 3:38 sa kaadlawon niadtong Domingo, Hunyo 25, sa Barangay Palanas, lungsod sa Alcantara, habagatan-kasadpan sa Sugbo.
Giila ang biktima nga si Kirk Villacencia, 18, ulitawo, gideklarar nga dead on arrival sa Badian District Hospital.
Nakaangkon kini og samad pinusilan sa walang bahin sa iyang dughan.
Matud pa ni Police Captain Analiza Comaling, hepe sa Alcantara Police Station, nga nibiya ang biktima sa ilang balay aron mopalit og kape apan sirado na ang tindahan sa duol, sa iyang pagbalik kalit kining giduol sa wala mailhing tawo ug gipusil sa walang bahin sa iyang dughan.
Duha ka anggulo ang gitan-aw sa kapolisan nga posibleng motibo sa pagpatay, mao ang kasina o love triangle.
Matod sa kapulisan, posibleng adunay nasina sa biktima nga maayong rapper.
