Gikonsiderar sa Commission on Elections (COMELEC ) ang pagpahigayon og mga kalihokan sa pagparehistro sa mga botante sa gabii aron madasig ang daghang Pilipino nga magparehistro alang sa Disyembre 1 Barangay ug Sangguniang Kabataan Elections (BSKE).
Matod ni COMELEC Chairperson George Garcia, ang maong plano kabahin sa pagpauswag sa “Register Anywhere Program” (RAP) nga gitakda gikan Hulyo 1 hangtod 11.
Nahisgutan usab ni Garcia nga kung kani-adto sa adlaw ipahigayon ang voters registration, apan karon, ang “Register Anywhere Program” buot ng mahitabo sa gabii.
Gipanglantawan usab sa buhatan ang pagpahigayon sa enhanced RAP sa mga lugar nga naglihok sa gabii, sama sa mga tugpahanan, pantalan, ug mga trabahoan.
Hinungdan nga nanghinaot usab ang hepe sa poll body og dugang nga oras sa pagparehistro gumikan makatabang kini kanila nga makab-ot ang ilang target nga 1 milyon nga bag-ong mga magparehistro.
Gawas sa bag-ong mga nagparehistro, ang COMELEC modawat usab og mga aplikasyon alang sa reactivation ug pagbalhin sa rehistrasyon, ug uban pa, atol sa Hulyo 1 ngadto sa 11.
Ang mga kalihokan sa pagparehistro sa mga botante ipahigayon sa tibuok nasud gawas sa Bangsamoro Autonomous Region sa Muslim Mindanao, tungod kay ang rehiyon gikatakda nga mopahigayon sa ilang unang parliamentary nga eleksyon sa Oktubre 13. | Bombo Irene Ardiente
